Нататнік "Мора"

"іграй моря, радуйся зямля..." канешне, з іншай оперы, але гучыць у галаве. 

Нататнік для таго, хто засмуткаваў па цеплых марскіх хвалях.

Фармат А5, 100старонак, фарзац сіняга колеру, вокладка лён упрыгожаны вышыўкай, плецены каптал, класічны кніжны пераплет. Прадаецца.

Метрыка на навасёлкі

Ёсць такія людзі для якіх хутка натхняешся і робіш. Нават калі не стае часу. 

Гэтая метрыка вышытая была хутка, падораная з радасцю практычна год таму, а цяпер захацелася ўзгадаць пра яе тут для вас.

Нататнік "Ружа кветка"

Вынік ўжо сапраўды восеньскіх выходных. 

Нататнік фарматам А6, 180 старонак фарбаванай асаблівай паперы, класічны кніжны пераплет і чароўная ружа, як вянец усей працы. традыцыйна цалкам ручная праца.

Знаёмцеся!

Метрыка для маленькай паненкі

З мяне кепскі блогер,не рэгулярны і цяжкі на пад'ем. Усе гэта вядомы факт, але мне так радасна сення, што часам ёсць гэтыя маленькія замовы/працы, якімі нястрымна  хочацца падзяліцца са светам. Радасна, што ёсць гэтая мая справа, якую я не магу не рабіць, мае паперкі, нітачкі і тканінкі. Радасна, што радасць гэта не толькі мая.

Дызайн luli
Пяльцы не вялікія памерам, каля 13 см.

Даўгачаканы нататнік / альбом

Нават для майго тэмпу, гэты нататнік атрымаўся "долгостоем" і "будаваўся" амаль як метро. Пачалося ўсё гады два таму, у той час быў зроблены папяровы блок і пакінуты да лепшых часоў, а птушка вышывалася гэтай зімой у прадчуванні вясновага адраджэння. А нататнік нарадзіўся толькі гэтым месяцам. 

Як і многае ў жыцці даўгачаканае становіцца асабліва родным, усе робіцца ў свой час. І не трэба яго спяшаць...

З днём Ведаў,Сябры!

З днём Ведаў,Сябры! 
Хай у нас заўсёды хапае мудрасці жыць сумленна і вучыцца на сваіх памылках!

"Клапатлівая дзяўчынка"

Маленькая дзеўчынка так шчыра клапоціцца аб трусіках, 

такой пяшчоты часам шалёна не хапае ў горадзе, мітусьні і беге па коле. Асабліва адчуваеш гэты дэфіцыт з надыходам гэтай халодна-вільготай восені. Музыка мяняецца на добрае рэтра, Анна Герман і Валянціна Талкунова ўсё часцей спяваюць па вечарох.

Такі стваральны перыяд калі насуперак суму пячэш кексы, гатуеш смачна і вышываеш такія цёплыя працы...каб сагрэцца!

Пано атрымалася 15 см.

Дызайн :  luli

Тканіна: лён Permin 32

ніткі Anchor і Гамма

+ 

фетр і драўляныя пяльцы.

"Мушкат"

Гэта частка серыі, якая складаецца з трох брошак і вось пакуль што завяршаецца гэтым драбнюткім пано ў пяльцы "Мушкат". Гэтая кветка, якую так любяць пажаваць козы і кветка, што авалодала маім сэрцам сваім пахам.

Дызайн: GERDA BENGTSSON

Тканіна: лён Zweigart

ніткі Ariadna

+ 

фетр і драўляныя пяльцы.

Паспела зрабіць фота ў цеплы сонечны дзень,а зараз намі авалодаў дождж і настрой цяпер рамантычна-гарбатны,не да здымкаў))) 

3 гады.

13 жніўня было 3 гады як я зрабіла свой першы нататнік, я гляджу на яго - такі просты. Бачу мноства недаробак, памылак,але люблю яго ўсё так жа, як у першы дзень. Ен быў пачаткам усяго, што было пасьля, усяго, што яшчэ будзе зроблена, пачаткам таго, што забараняла кіснуць і настойвала на развіцці , каб сення я магла для сябе зразумець: мае нататнікі,мае вышытыя прыміцівы ў пано і брошках, гэта тое, без чаго я не магу. 

Працы мяняюцца,мяняецца месца жыхарства, у нечым пачынаю сумнявацца, але мае маленькія працы заўжды ратуюць,не мае значэння-раблю я іх на замову,на продаж, для душы, у падарунак. 

Гэта мая радасць! 

зайка)

сення і ўчора,і ўжо не адзін дзень пахне вясной. паглядзім ці не падманвае яна нас)))

Цукерка №2

 Цукерка гэтым годам будзе разыгрывацца  ў маей суполке  http://vk.com/luchtalohija. 

Таму калі ёсць жаданне атрымаць мядзьведзіка ў падарунак хуткім часам, чакаю вас там.

Род(нае)

не хочацца слоў марных казаць. 

надыхалася вясковым паветрам,адчула смак горада, зрабіла прыгожыя рэчы-атрымаўся шчыры тыдзень.

усё насамрэч добра. хутка планую цукерку...

Пра каханьне...

Гэтыя птушачкі хоць і былі знойдзены абсалютна выпадкова ў рукадзеньным японскім часопісе, але шалёна нагадваюць мне арнаментаваныя галубкамі беларускія рушнікі. Тыя самыя дзве птушкі павернутыя галоўкамі адна да адной, што сімвалізуюць каханьне ў самым росвіце.

Кахайце адно аднаго!

І пра дробязі:

фармат: дыяметр 16см.

скарыстаны нямецкі лён (Zweigart)

ніткі мулінэ (Мadeira)

+ 

фетр і драўляныя пяльцы.

Ружа.

Трошкі прачнулася. Усё. Аднаўляю працу і блога і творчасьці. Спадзяюся, што гэта не застанецца проста словамі. 

а пакуль малюткая ружа, дыяметрам усяго 10 см., вельмі прыемная і пяшчотная. 

дызайн, як не дзіва, знойдзены ў нейкім японскім часопісе,нажаль не помніцца,якім менавіта.

"Сьлімак"

Сьлімакі ў прадчуваньні вясны! і гармоніі! 

Вокладка: лён+лён+вышыты сьлімак

Фармат: 14,5/10, 110старонак паперы прыгожага зялёнага колеру.

Класічны кніжны пераплет, плецены ўручную каптал, фарзацы насычана зялёнага колеру.

П.С. Гэта сьлімак валацуга, год таму яго можна было сустрэць у кампаніі сяброў на маей ільняной тобре, цяпер вось нататнік. І ва ўсім вінавая мая любоў да дызайнаў Picoti Picota;)

Пачатак прадчуваньня навагодніх сьвятаў!

Сёньня першы дзень зімы, першае сьнежня! І мне здаецца, што ўжо ўвесь сьвет чакае на сьнег, на прыемны водар мандарынаў, на зімовую казку. Я чакаю дакладна!

І гэты нататнічак увасабляе маё прадчуваньне...ён цёплы і шчыры...

як старыя казкі па тэлівізары раніцай 31 сьнежня, пакуль бацькі гатуюць розныя прысмакі і рыхтуюць казку для сваім маленькіх анёлкаў.

Фармат: А6, 90 бела-блакітных старонак,

фарзацы сіняга колеру,

класічны кніжны пераплёт, 

каптал плецены ўручную сіняга колера.

Вокладка: лён Permin, гузік + гумка

і канешне вышыны Алень (дызайн традыцыйна

Agnes Delage-Calvet & Anne Sohier-Fournel)

Нататнік "Кед"

Часам з-за адсутнасьці часу, мнімай альбо натуральнай ніякай розьніцы, чалавек губляе любімы занятак. Але я ,праўда, не згубіла. І свайго часу чакаюць яшчэ некалькі прыгожых, я лічу, рэчаў.

Гэты нататнік зроблены яшчэ ў верасьні і нават фотаздымкі былі, проста словаў адпаведных яму не знаходзілася.

Цяпер знайшліся:)

Ён вельмі просты, як кефір з батонам на Першамайскай, як гарачы шакалад з Камунаркі:).

Ён пра тое, што трэба рабіць крокі, калі рвецца душа, шукаць і знаходзіць!

Фарматам А6, 90 старонак сьветла-фіялетавай паперы могуць захаваць міліёны кавалкаў думак і запланаваных падзей!

Класічны кніжны пераплёт і плецены ўручную каптал шэрага колеру. 

Чырвоная ў бурбалкі стужка не дасьць згубіцца ў прасторы літарак і старонак.

Нататнік "Задуменны анёлак"

я люблю мроіць, люблю ўяўляць казачныя далягляды. сьніць каляровую рэчаіснасьць, тады раніцай лёгка фарбуецца дзень і анёла-ахоўнік не збочыць з дарогі, бо ведае, што насамрэч ёсьць тваім сэнсам. Неяк так. Дык хай крылаты анёлак фільтруе думкі і запісы, каб толькі аптымізму было месца ў галаве і на паперы.

Дызайн:Agnes Delage-Calvet & Anne Sohier-Fournel

Вокладка: лён (Permin) + бавоўна

Фармат: А5, 80старонак бела/фіялетавай паперы, фарзацы сьветларужовага колеру, на фарзацы кішэнька, каптал плецены ўручную жоўтага колера.

"Конік"

Колькі конікаў на сьвеце, розных колераў і памераў, з рознымі мэтамі і марамі...

Толькі ў снах і казках бачу менавіта такіх: драўляных і ня спынных!

Нататнік "Дзьмухавец"

Моцы не хапіла, каб утрымацца...пасьля Анёлка з дзьмухаўцом было проста неабходна зрабіць самадастатковы, паўнавартасны Дзьмухавец. 

І тым больш яны хутка зусім зьнікнуць, да наступнай вясны, а гэты прыгажун без перапынку зьзяе сваёй цяплынёй.

 Дызайн: (я пачала паўтарацца, але што тут зробіш) Agnes Delage-Calvet & Anne Sohier-Fournel

Вокладка: лён Permin32 + бавоўна ў маленькія бурбалкі.

Фармат: А5, 70 старонак, плецены ўручную каптал, фарзацы салатнага колеру + кішэнька.